Гижӧ комиӧн, или коми-пермяцкӧй диктант

    Тӧвпом (февраль) 17 лунӧ Перем ладорын чулӧтсьӧ коми-пермяцкӧй кывлӧн лун. Быд районнэзын нуӧтӧны быдкодь акцияэз, флешмоббез, конкурссэз, отирсӧ корӧны ёнжыка баитны комиӧн, не вунӧтны.
    А таво медодззаись чулӧтчӧ акция "Коми-пермяцкӧй кыв вылын ӧтувья диктант", кӧда мунӧ кыдз Кудымкарын да районнэзас, сідз и Перемын, Сыктывкарын да Москваын. Быдӧсыс медодз вӧлӧм 32 площадка, но луннас содӧмась эшӧ куима да быдӧсыс лоис 35. Ме кӧсйи жӧ участвуйтны эта акцияас да пыралі Лихачёв нима библиотекаӧ Кудымкарӧ гижны диктантсӧ. Отирсӧ видзчисьӧмась 70 гӧгӧр морт, а локтісӧ 80 саяс!!! Унажыкыс студенттэз карся ССУЗзэзісь, а сідз жӧ ыджытжык морттэз, кинкӧ пӧ даже Москваись локтӧмас гӧститны да пыраліс тожӧ гижны, проверитны ассис грамотностьсӧ.

   Темаыс диктантлӧн вӧлі босьтӧм Василий Климовлӧн "Гавкалӧн бедь" нима повестись торись, кӧда шусьӧ "Жысь Егорлӧн висьт". Сідз кыдз мартӧн Василий Васильевичлӧ тырӧ 90 во, то решитісӧ босьтны текстсӧ сы повестись.
   Пыраліс диктантсӧ осьтны Коми округлӧн юралісь, министр да коми гижись - Виктор Рычков. Сідз жӧ сыкӧт вӧлісӧ краевӧй администрацияись гӧссез да нац.объединениеэзлӧн морттэз.

   Чужӧммез гижиссезлӧн югьялісӧ, вӧлісӧ быдыс радӧсь, баитісӧ быдӧнныс комиӧн, то ли параэзсянь лэдзисӧ да сійӧн, то ли погоддяыс гажа, а поди и коми кыв понда нія сэтшӧма шыннялӧны. Результаттэз лоасӧ сайт вылын, видзӧтам, надейтча "5" вылӧ гижи.
   P.S. Мый только эг вежӧрт ме, этӧ сертификатыс гижӧм рочӧн!!! А мыйнӧ гижӧма гырись букваэн сы весьтын: ГИЖӦ КОМИӦН!