Даурия, или кыдз ме ветлі Ылісь Востокӧ

     

      Кӧр вӧлі Воркута сайын Гагарацкая нима станция вылын да видзӧті Полярнӧй Ураллӧн иззэз вылӧ, вӧлі ӧддьӧн окота кайлыны ны вылӧ да и ветлыны ны сайӧ – Азияӧ. Но сэк сідз нем эз и пет, эд ме вӧлі станцияын практика сьӧрті. И кин бы думайтіс, что мӧдгоднас ни вуджа Уралсӧ да иньдӧтча кӧрттуй вылӧт Хабаровск ладорӧ.

  Одзжык поездӧн медылынсӧ ветлі только Кировӧдз и то кажитчис ылынӧн, а эстӧн ковсис Перемсянь мунны 6 лунӧн 7000 км. Сымда жӧ ылынаыс Мадридӧдз. Быдӧс туйыс муніс донтӧг, эд отсаліс эта поездкаын Министерство Обороны, сетіс сухпаёккез кузь туй вылӧ, кӧмаліс, пасьтӧтіс кыдз и колӧ. Сідз и вӧрзим кӧдзыт арся ноябрскӧй ойӧн сетны страналӧ долг – служитны армиын. Одзжык шуа, мый ог понды висьтасьны кытӧн да мый служиті, сідз кыдз гос.тайна вылын гижси.

    Мӧдлуннас жӧ тӧдім, мый вагонаным мунӧ миянкӧт иностранец, Мускрун карись бельгиец Сильва. Кузь, кӧсыник, орсывліс пыр MacBook вылын Wormsӧн да сёйліс кытшӧмкӧ бельгийскӧй бульоннэз, кӧдійӧн и вердіс миянӧс – солдаттэзсӧ. Ачыс сія фотограф, вӧлӧма пӧ уналаын ни: Египетын, Испанияын, Финляндияын, чулӧтлӧм фотовыставкаэз Францияын, Бельгияын да Санкт-Петербургын, а ӧні мунӧ Байкал вылӧ. Баитім сыкӧт умӧлика английскӧя да сылӧн француз-роч разговорникӧн.

    Кытӧнкӧ Новосибирсксянь кӧрттуй вокзаллэз вылын пондім пантавлыны китаеццезӧс и кыным ылынжык мунім нія вӧлісӧ унажык. Улан-Удэ бӧрсянь сёр рытӧдз пукалім видзчисим кӧр пондам мунны Байкал ты дорӧт, кӧр эд сійӧ эшӧ адззылан. 30 км мунӧ Байкал дынӧт кӧрттуйыс и быдӧс сійӧ растояннёсӧ мийӧ нёджжасим, басӧк, нем он шу.

   Погоддя Сибирьын кӧдзыт, арӧн овлӧ -35 ни. Кузь да ыджыт иззэз тӧдчисӧ быдлаын, чочком только. Кватьӧт лунӧн ни одз югыт, шондіа асылӧн вӧлись локтім Хабаровскӧ и мый перво сэтчин син одзӧ усис – Амур ю, паськыт и паськыт,  а сы сайын куйлӧ Китай му. Не весь кӧр сулалім вокзал одзын миянӧс фоткайтіс кытшӧмкӧ томыник китаянка. Транспортыс карас куш не миян: Японияись, Кореяись, Китайись. Мияніссезӧн только ветлӧны полиция, скорӧйез да армия.

  Кытшӧм бы частьӧ эг вовлӧ, пыр, кӧр юаласӧ кытісь ми, шуӧны: -О, реальные пацаны пацаны локтісӧ! Да и шуӧны миян йылісь кыдз «люди с Запада». Баитӧмныс сэтшӧм жӧ, туйӧ содтыны, мый Забайкальеын, Бурятияын сёрниас часто туйӧ кывны фраза «Чё кого» да каррезнысӧ дженыта шуӧны мӧдкодя: Владивосток туйӧ Владик,  Хабаровск – Хабара, Комсомольск-на-Амуре – Комса, Благовещенск – Блага. Кадыс вӧтӧ Перемскӧйсӧ 5 час вылӧ.

  Ӧтпыр Комсомольскын кӧр вӧлім, ӧтік ойӧн усис метра лым, а кӧр сюри Амуркаӧ ни то сэтчин лымыс етшажык миянся даже, да и быдса год шондіа, гажа. Вот только гожум помӧ ыджыт бабыввез унаӧн вовлӧны да кӧдна годдэзӧ саранча.

  Кин бы думайтіс, что ылынся-ылын гортсянь ме частям пантала коми-пермякӧс, офицерӧс. Кыдз жӧ рад вӧлі! Баитім сыкӧт, тӧді мый общӧй тӧдса морттэз эмӧсь даже! Кытшӧм жӧ Муыс круглӧй!

   Сэтшӧм сідз шусяна путешествие петіс Даурияӧ или кыдз ӧні шуӧны - Амур областьӧ.